Олунньу 14 күнүгэр күнүс 14:00 чаастан М.А. Ноговицын аатынан култуура киинигэр 2023 сыл түмүгүнэн Өрөспүүбүлүкэбит социальнай–экэнэмиичэскэй балаһыанньатын туһунан Саха Өрөспүүбүлүкэтин бырабыыталыстыбатын отчуоттур мунньаҕа ыытылынна.
Биһиги нэһилиэккэ үлэлиир бөлөҕү салайан кэллэ Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Сергей Васильевич Местников.
Нэһилиэнньэ мунньахха көхтөөх кыттыыны ылла, үгүс элбэх ыйытыылар киирэн туһааннах специалистар сөптөөх хоруйдары биэрдилэр, ону таһынан нэһилиэккэ бүгүҥҥү күҥҥэ тыҥаан турар боппуруостары туруорустулар. Сүнньүнэн спортиванай заал тутуллуутун, ититэр систиэмэҕэ нэһилиэнньэ холбонуута, заправка төгүрүк сыл үлэлээһинэ уо.д.а. Маны таһынан Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Сергей Васильевич Местников биир дойдулаахпытыгар, улуус депутаатынан, баһылыгынан үлэлээбит В.У. Тимофеевка, Болугур орто оскуолатын учууталыгар Г.В. Нестероваҕа Правительство аатыттан бэйэтин махтал суругун уонна сэмэй бэлэҕин туттарда. Улуус баһылыга Кузьмин С.Н. нэһилиэк эдэр ыалларыгар дьиэ туттарга анал сертификаттары биэрдэ. Түмүккэ Саха Өрөспүүбүлүкэтин бырабыыталыстыбатын үлэтин нэһилиэнньэ биһирээбитин биллэрдэ.
