Амма улууһугар ыыталлыахтаах Олоҥхо ыһыаҕар бэлэмнэнии чэрчитинэн олунньу ый 27 күнүттэн кулун тутар 3 күнүгэр диэри Олоҥхо тыйаатыра гастролун саҕалаата.
Олунньу 27 күнүгэр Болугур нэһилиэгэр кэлэн култуура киинин үлэһиттэрэ ыалдьыттары сылаас чэйдээх, минньигэс астаах көрүстүлэр. 28 чыыһылаҕа сарсыарда 10:00 чаастан «Колосок» оҕо уһуйааныгар «Дьорҕостой Бэргэн» куукуланан испиктээкили оҕолорго көрдөрдүлэр.
Күнүс 14:00 ч. олоҥхо тыйаатырын ааттаах-суоллаах толорооччулара маастар-кылаастары ыыттылар. Кылга (кырыымпаҕа) — Айсен Кысылбаиков, Прокопий Сыроватский; тойукка — Дмитрий Иванов. Маастар-кылааска сылдьыбыттарга сертификат туттардылар.
Нэһилиэкпит маастара Устинов Степан Прокопьевич оҥоһуктарын, Михайлова Ульяна Майродовна — Маай Кыыһа бэйэтэ оҥорбут ыраастанар, арчыланар бокстары атыылаатылар.
Киэһэ 19:00 чаастан «Ала Булкун» бастакы көрдөөх-олоҥхо испэктээхилин көрдөрөн дьон биһирибилин ыллылар. Олохтоох дьаһалта баһылыгын солбуйааччыта Раиса Николаевна Софронова Олоҥхо тыйаатырын коллективыгар, биир дойдулаахпытыгар Күннэй Александровна Николаеваҕа махтал суруктары, сэмэй бэлэхтэри туттарда. Култуура киинин уус-уран салайааччыта Платонова Евдокия Васильевна тойукка маастар-кылаас ыыппыт Дмитрий Ивановка олоҥхоһут-импровизатор биир дойдулаахпыт А.Г. Агапов туһунан матырыйааллары туттарда. Ону таһынан Күннэй Николаевнаны, олоҥхо тыйаатырын коллективын нэһилиэкпит ытык-мааны киһитэ Мария Васильевна Софронова эҕэрдэлээтэ, алгыс тылларын тириэртэ.
